– Buorre aktisasjbargo diehti lip vuorbástuvvam

Sámediggeráde Inger Eline Eriksen Fjellgrena mielas la sáme sebrudahka vuorbástuvvam sadjáj oadtjot Duohtavuodakommisjåvnåv gå li nav buoragit aktan barggam.

Inger Eline Eriksen Fjellgren, Sara Ellen Anne Eira, Risten Turi Aleksandersen.jpg
FOTO | Sámi girkoráđi jođiheaddji Sara Ellen Anne Eira, sámediggeráđđi Inger Eline Eriksen Fjellgren ja Sámi girkoráđi váldočálli Risten Turi Aleksandersen

Ođas | Almmuhuvvon

Iektu Stuorradigge mierredij ásadit Duohtavuoda- ja såbadimkommisjåvnåv, mij galggá guoradallat dárojduhttempolitihka vájkkudusájt Vuonan. Sámediggeráde Inger Eline Eriksen Fjellgren tjuovoj dán ássje dágástallamav Stuorradikken ja sån duodaj tjaŋgedij dájna mærrádusájn.  

– Sámedikken la læhkám buorre aktisasjbarggo ållusij ja danen lip vuorbástuvvam kommisjåvnåv sadjáj oadtjot.

Aktisasj strategijjav dahkam

Fjellgren ållagasj nammat aktisasjbargov Sámedikke vuorrasijrádijn.

– Sámedigge l gijttevasj dan åvdås majt Sámedikke vuorrasijráde la dán ássjen måttijt jagijt barggam. Ållagasj buorre lij gå sij sæbrrin rabás guláskuddamij Stuorradikken. Mávsulasj lij gå Stuorradigge besaj gullat majt ållessjattuk ulmutja li åtsådallam ja gåktu li hæhttum gierddat stáhta politihka diehti.  

Sámediggeráden Fjellgrenan árrat lij juo tjåhkanibme Trygg Jakolajn Vuona Guojnnalihton. Dåppe aktisattjat strategijjajt dagájga gåktu dakkir kommisjåvnåv åttjudit. Dan tjåhkanime  maŋŋela Sámedigge girjev fylkasuohkanijda sáme guovlon sáddij gånnå bivddij sijáv kommisjåvnå ásadimev doarjjot, ja nav li aj maŋŋela dahkam.  

Girkko doarjja stuorra ávkken

Sámedigge la aj ednagit Sáme girkkorádijn guládallam, ja sijá doarjja la læhkám stuorra ávkken.  

– Girkko ja stáhtta libá áttjak sirádam. Girkkon la ájn ájnas sadje Sámen ja aj ietján Vuonan, ja adjáj stuorradiggeájrrasij gaskan. Sábmelattjajda la árvvon gå girkko mijáv dán bargon doarjju. Mij vierttip mujttet adjáj dav vuojŋŋalasj oasev dán såbadimbargos huksat. Girkkon la dat máhtto mij dasi gájbbeduvvá, javllá Fjellgren.

Jus ájgo ságájdahttemav, de guládalá aktijvuodav sámediggerádijn Inger Eline Eriksen Fjellgrenajn,  mob. 414 58 703.

Fant du det du lette etter?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!